Exo 19 | BJR | STEP | Isaraee máqannaasa Isipa máqa máaqakiqari Reefidimma máqa máaqaki ani máriufaqa miqóoqari qaaramoó úqoona indaarúqáa fáasaanasaa Reefidimma máqa máaqaindari Sinái aadána máqa máaqai óonu máriqau. Miqóo misa Sinái áaqana áikunni úiqaana máqa usakásee máriqau.

Exodus 19

Isaraee máqannaasa Sinái áaqana áikunni ani máriqau.

1 Isaraee máqannaasa Isipa máqa máaqakiqari Reefidimma máqa máaqaki ani máriufaqa miqóoqari qaaramoó úqoona indaarúqáa fáasaanasaa Reefidimma máqa máaqaindari Sinái aadána máqa máaqai óonu máriqau. Miqóo misa Sinái áaqana áikunni úiqaana máqa usakásee máriqau.

3 Mooseefa miqóoqari Sinái áaqanasaa Ánutuna faqa ufa qíraree qímasee óoru finau. Yáaweefa áaqana sáaqari Mooseena áaramaseenoo qímaminau. Anée Yakooboona áiku ásauku Isaraee máqannaasa maaqí qímasee qímannimia. 4 Ínnee qiní óosana qáfee máriafanoo. Qinée Isipa máqannaa nárunnana ínnee qáfaafanoo. Qinée ínni quqaumu ánaaqiara foorá itáteeqeeqa qíqóosasáa quqásèeqa uqéereeqee qeeqá márunannai quqáqaunaqa máriafanoo. 5 Ínnee qiní ufa iriséeqa qiní moodáanaki kíra ufa mau fíqa qiní faiqí ánaasee márifaránoo. Aiqáma maa maqa maaqáfa faqa faiqí ánaasee faqa qiníndi kai máridaqa ínnee qinée qeeqára útaaqama qáunausa máriafanoo. 6 Ínnee qiníndi uqanna máridaqa qiní aanáiqi kírausa máriafanoo.

7 Mooseefa irisée óoqureenoo Isaree máqanaa úriqararausa suqúseenoo aiqáma Yáaweefa qímamu ufána qímanniminau. 8 Faiqí ánaasee Yáaweena ufa iriséeqa aiqámausa moodáa kari nóo raqá máree qiqau. Yáaweefa aiqáma ufa qínnana maasá írianaurée qiqau. Miqí qufanóo Mooseefa misá ufa iriséenoo Yáaweena qímaminau.

9 Yáaweefa misá úfa iriséenoo Mooseena qímaminoo qinau. Qinée ámatooki árira óonnamukiqari anée íannánnai qumurée aní faqa ufa qíanaqa faiqí ánaasee iriséeqa miqóoqari áni ufara kúqaa fee qifáranoo. Miqí qímasoofanoo Mooseefa faiqí ánaasee quú úfana Yáaweena qímaminau.

10 Qímamisoofanoo Yáaweefa kafáa Mooseena qímaminoo qinau. Anée kafáa óoquree faiqí ánaasee maaqí qímasee qímannimia. Misá aiqáma maqee faqa dúna faqa nári qamunna nammári uqusée nári nifaaqa ánukamasee qiní qimooqírara deedaqiaqa. 11 Deeda qímarifaqa dúna káqi mári mooná qinee Sinái áaqanasaa qumuráanaqa aiqáma faiqí ánaasee qiní qíqafeefáranoo. 12 Anée áaqana ameemaanai fíqu fíqumma óosumma sáinaqa sía faiqí ánaasee mina fíàaqaráaqa. Miqímmáseenana qímanniminaqa sía áaqanai óoru fuaqa, sía uqanna miná aaqá fuaqa. Minásaa áiku ráinafa kúquannoo. 13 Ínnee miqínna fasiqana sía uqanna nísaukunnai áruaqa, óoni sámu fee feefannái fee kúqa áruaqa. Maa ufána faiqí faqa aandáura faqa qídaqa. Miqínna fásiqa fée aandaú fée kúquannoo. Ukeena fuaqáifaqá kaí faiqí ánaasee áaqana áikunni óoru fuaqa.

14 Mooseefa áaqanaindari qumuréenoo faiqí ánaasee Yáaweenara deedaqa másee amooqiaqéera qímanniminau. Miqí qufaqá faiqí ánaasee náriqa qamunna nammári úqiqau. 15 Miqí márufanoo Mooseefa qímanninau. Dúna káqi mári mooná deedaqiaqa. Maqee óosana arasée sía ánaasee sakasée faiqaaqa.

16 Qaara afuru faisoofanóo qaaramoókufanoo kanánaana áaqanasaa ukeena firaaná fuaqárana námu fáqa qámatooki kira óonnamu námu fáqa aakuasáa innaarúnai námu faqa ufaqa faiqí ánaasee úiqaana máqaki máriusa aiqáma náindiri roofaqá rufíaqau. 17 Mooseefa faiqí ánaasee aiqáma úiqaana máqakinaana nífiqeenoo Yáaweena paqúrirara áaqana áikunni óonu kikíqino márinau. 18 Yáaweefa idáuruki qari Sinái áaqanasaa qumu márunara idá muna fannoo áaqana aiqáma rafáaqafínoo márinau. Mi munáfa fíraa ída múnara foorá óoru fúfaqa faiqí ánaasee qáfoofanoo firaaqóo náindiri ranau. 19 Ukeena feendúndáanài qímarinau. Miqí qímarufanoo Mooseefa Yáaweena qímamufanoo Yáaweefa kafáa innaarúnai dárara qíranakiqari narí qímaminau. 20 Yáaweefa Sínai áaqanasaa qumuréenoo Mooseena áaroofanóo óorufinau. 21 Óoru roofanóo Yáaweefa Mooseena qímaminoo qinau. Anée óoquree faiqí ánaasee qímanniminaqa sía óosu áiàaqaree qiní qíqafarara ániaqa. Misá miqíqa moómoosa kúqifaranoo.

22 Aanáiqikirausa faqa qiní daaqá ániàní qímasee ánukamafiqa ániaqa. Sía miqífaqa misá aupúrarana nímianaura. 23 Mooseefa Yáaweena úfa iriséenoo qímaminoo qinau. Faiqí ánaasee sía amana Sinai áaqanasaa úrifaranoo. Anée aneenná kai maasa daakápàma séenana náaquqara áaqana fíqu fíqumma amusá arasáanáqa sía úrifaranoo.

24 Yáaweefa iriséenoo Mooseena qímaminau. Óoqureenana Áaroona faqa áfiqee úrua. Qiní aanáiqikirausa faqa faiqí ánaasee faqa sía qiní qíqafararee qímasee amusá rapéemmásee úruaqa. Miqífaqa qinee misá ummaara nímianaura.

25 Mooseefa iriséenoo óoqureenoo faiqí ánaasee aiqáma Yáaweefa quú úfana qímanniminau.